ភ្នំពេញ៖ អនុប្រធានគណបក្សប្រជាជនកម្ពុជា សម្ដេចក្រឡាហោម ស ខេង បានស្នើដល់ក្រុមប្រឆាំងដែលតែងតែលាបព័ណ៌ក្នុងចេតនាធ្វើឱ្យបក្សប្រជាជនបែកបាក់ ឱ្យបញ្ឈប់នូវសកម្មភាពដែលល្ងិតល្ងង់ទាំងនេះព្រោះគ្មានបានផលនោះទេ ក្រៅពីធ្វើឱ្យជាតិបែកបាក់ប៉ុណ្ណោះ។

សម្ដេចក្រឡាហោម ស ខេង បានលើកឡើងនៅថ្ងៃទី១១ ខែកញ្ញា នេះថា បន្ទាប់ពីរដ្ឋាភិបាលថ្មីបានបង្កើតឡើងមជ្ឈដ្ឋានប្រឆាំងនៅតែបន្តលើកឡើងដដែល និងឃោសនាប្រឌិតព័ត៌មានអាក្រក់ក្នុងបំណងដើម្បីបំបែកបំបាក់ផ្ទៃក្នុងគណបក្សប្រជាជនកម្ពុជា ហើយបានយកឈ្មោះសម្ដេចជាប្រធានបទមួយសម្រាប់បម្រើមហិច្ឆតាទុច្ចរិត និងស្មោកគ្រោករបស់ពួកគេ។

សម្ដេចបានលើកឡើងថា៖ «ការលើកឡើងរបស់មជ្ឈដ្ឋានដែលមាននិន្នាការប្រឆាំងនេះ ជាការប៉ុនប៉ងទាំងល្ងិតល្ងង់ក្នុងគ្រាអស់សង្ឃឹម និងជាការបំផុសបំផុលដ៏គ្រោះថ្នាក់ដល់ប្រទេសជាតិ»។

ជាមួយគ្នានោះសម្ដេចក្រឡាហោម បានអំពាវនាវឲ្យក្រុមជនដែលសម្ដេចចាត់ទុកថា អគតិ និងទុច្ចរិតទាំងនោះ បញ្ឈប់ជាបន្ទាន់រាល់ទង្វើទាំងឡាយណាដែលប៉ះពាល់ដល់សន្តិភាព ស្ថិរភាពនយោបាយ និងរាំងស្ទះដល់ការអភិវឌ្ឍសង្គម សេដ្ឋកិច្ចកម្ពុជា និងធ្វើឲ្យសាធារណជនមានការភ័ន្តច្រឡំលើគោលការណ៍ដឹកនាំរបស់គណបក្សប្រជាជនកម្ពុជា។

សម្ដេចបានបញ្ជាក់ពីជំហរគាំទ្រដដែលនូវរាជរដ្ឋាភិបាលអាណត្តិទី៧ នៃរដ្ឋសភា ដែលដឹកនាំដោយនាយករដ្ឋមន្ត្រីសម្តេចមហាបវរធិបតី ហ៊ុន ម៉ាណែត៕